महावितरणचे ग्राहकांना कळकळीचे आवाहन

वीज कर्मचाऱ्यांच्या सुरक्षिततेसाठी थेट फोन नकोच!

*कोल्हापूर/दि. 22 एप्रिल 2026  रात्रीची वेळ असो वा भरदुपार, अचानक वीजपुरवठा खंडित झाला की आपण तातडीने ओळखीच्या वीज कर्मचाऱ्याचा किंवा वायरमनचा वैयक्तिक नंबर शोधून त्याला फोन लावतो. मात्र, तुमचा हा एक फोन दुरुस्तीचे काम करणाऱ्या कर्मचाऱ्याच्या जीवावर बेतू शकतो. ही बाब लक्षात घेऊन महावितरणने ग्राहकांना थेट फोन न करण्याचे कळकळीचे आवाहन केले असून तक्रार नोंदणीसाठी उपलब्ध असलेल्या अधिकृत पर्यायांचा वापर करण्याचे सुचवले आहे.

*सुरक्षिततेला सर्वोच्च प्राधान्यः* दुरुस्तीचे काम सुरू असताना कर्मचाऱ्याचे पूर्ण लक्ष तांत्रिक बाबींकडे असणे आवश्यक असते. अशावेळी ग्राहकाचा फोन आल्यास त्यांचे लक्ष विचलित होऊन भीषण अपघात घडण्याची शक्यता नाकारता येत नाही. अनेकदा कर्मचारी कामात व्यस्त असल्याने फोन उचलू शकत नाहीत, ज्यामुळे ग्राहकांचा रोष वाढतो. कर्मचाऱ्यांच्या सुरक्षिततेसाठी आणि कामातील एकाग्रता कायम राखण्यासाठी कॉल सेंटर किंवा मोबाईल अॅपचा वापर करणे हिताचे आहे. वीज पुरवठा खंडित झाल्यानंतर १० ते १५ मिनिटे वाट बघितल्यानंतर आपली तक्रार महावितरणकडे नोंदवा.

*आता 'व्हॉट्सअॅप'वरही सेवा उपलब्धः* महावितरणने आपल्या सेवा अधिक सुलभ करत 'व्हॉट्सअॅप'वर तक्रार नोंदवण्याची सोय केली आहे. ग्राहकांनी ९१६७७७७७२१ या क्रमांकावर 'Hi' असा संदेश पाठवून आपली भाषा निवडल्यास त्यांना वीजबिल पाहणे, भरणे किंवा तक्रार नोंदवणे यांसारख्या सुविधा मिळतील. अधिकृत खात्याची खात्री करण्यासाठी कंपनीच्या नावापुढील 'ब्ल्यू टीक' तपासावी, असेही स्पष्ट करण्यात आले आहे.

२४ तास टोल-फ्री सेवा आणि मोबाईल अॅपः ग्राहकांच्या तक्रारींचे निराकरण करण्यासाठी महावितरणचे १८००-२३३-३४३५, १८००-२१२-३४३५ आणि १९१२ हे टोल-फ्री क्रमांक २४ तास कार्यरत आहेत. याशिवाय, 'महा-वितरण' मोबाईल अॅपच्या माध्यमातून एकाच वेळी अनेक वीज जोडण्यांचे व्यवस्थापन करणे शक्य झाले आहे. या अधिकृत प्रणालीमुळे तक्रारीची नोंद होऊन ती तातडीने संबंधित विभागाकडे पोहोचते आणि वीजपुरवठा जलद गतीने पूर्ववत होण्यास मदत होते.

*एसएमएस आणि मिस कॉलची सुविधाः* ज्या ग्राहकांनी आपल्या मोबाईल क्रमांकाची नोंदणी महावितरणकडे केली आहे, त्यांना केवळ एक मिस कॉल देऊन तक्रार नोंदवता येईल. त्यासाठी ०२२-५०८९७१०० हा क्रमांक उपलब्ध आहे. तसेच, ९९३०३९९३०३ या क्रमांकावर 'NOPOWER (ग्राहक क्रमांक) असा एसएमएस पाठवूनही तक्रार नोंदवत्ता येते. महावितरणने आपल्या बहुतांश सेवा आता ऑनलाइन केल्या असून www.mahadiscom.in संकेतस्थळावरही अनेक सुविधा उपलब्ध आहेत. एक जबाबदार नागरिक म्हणून अत्याधुनिक पयार्याचा वापर करून कर्मचा-यांच्या सुरक्षिततेला सहकार्य करावे, असे आवाहन महावितरणने केले आहे.

--------------------------------------------------------